الطانصيو
الكلمة حاصلة في حلقي
وانا عارف مسامح في حقي
هد الشي ماشي بالخاطر
الشكوى لله من فرط فالحقوق
شكينا بالسر وشكينا فالبوق
الله ينجيك من دعوة الصابر
الحر يفهم يذوق المعاني
والدلو المثقوب على البير باني
الى افلت الحبل يصبح فالقاع غابر
فالقلوب شحال من هموم وكيات
باكين من الداخل مابانت فينا علامات
في القلب بركان و الوجه ضاحك ناضر
حنا ساكنين في قاع المهراز
وفوقنا يدين تدڭـنا بالدزداز
الحليب راب والفقركافر
الزمان يدڭـ فينا ويهرس العظام
دموعنا مكتومة وصرطنا الكلام
المسؤولين وحنا الخط اللي بينا خاسر
سيرحتى تجي هدي عادة معروفة
ادارة سبيطار بمواعيد الناس طامعة ملهوفة
الطانصيو طالع والقلب عامر
نشوف حقي قدام عينيه مسلوب
يدي مشلولة وامري مغلوب
خليت امري لله القادر
الخوف هنا ساكن دڭـ الوتاد
الخوف من حق اللي عندو الاولاد
انت خشبة وسط مطارق ومناشير
خاف وزيد خاف وانت ڭـلة من طين
وسط قبيلة حجر وطوب وقلوب ميتين
وشحال من فاس ليك حافر
نتكلم ونڭـول في قلبي نار وحرقة
ولينا في زمان القانون خرقة
كاين ضو فالافق راني ما ناكر
والقلب يتالم واللي ما قفل والله ما يفور
واللي طاطا راسو كي المدفون فالقبر
والناجح اللي يفكر ويتدبر وخى تسلا الصبر
الامل في الله احوال هاد البلاد في الغذ تغير
نظم بلعيد بومرحوم زايدة في 2 - 5 - 2020
