القسمة
كل قسمة وراها مكتوب
وقدرك راه يتسناك
العمر سوايع محسوب
واجل ساكن معاك
الموت تجي غفلة
سحى يا بنادم ورجع
تجي كَـافلة تمشي كَـافلة
فالدنيا ضربات توجع
هاهيا جايا كتجري
جايا بلا علامات
ساعة اجلي ما ندري
عيون العاقلين بكات
الساهي بغرورك فيق
الليل والنهار زربان
لا تامن لدنيا ولا ثيق
ساعتك جايا ولا امان
الدنيا ماعندها قيمة
هيا غير متاع وغرور
الاقدار تقلع وتاد الخيمة
فيق ياللي وراها مجرور
الدنيا عليها تكلموا اللولين
شلى كلام وشلى معاني
على ربي يفيقوا التاليين
بين زواقها انت ميت وفاني
نظم
بلعيد بومرحوم في : 09/10/2021