الحياة اليوم

 

الحياة اليوم حياة الذل

اللقمة ولات بالحزارة

الى ما كنتي غول

ما تعيش فغابة الغضارة

لغة الدرهم طغا ت

وذهن السير بالجهارة

تجيب صفى  ومعقول ونيات

تصيب فطريقك حكارة

طلعت نخدم سبقوني

طردوني بصريح العبارة

ونزلت نسعى قوتي

صبت حتى النمل مشراره

تطلب الخدمة عليها تندم

ماكاين غير ارى ارى

سير واجي هي صنارة

يديك ويجيبك ما يحشم

عشت فالدنيا شلى عوام

فهمت وتعلمت شطارة

لكلام منو سيف منو بشارة

خممت في حالنا سنين

تاه عني الحل يافقراء

خممت وصبت الله حنين

حياتنا افراح وضصاره

لمحتاج محتاج عفة وقناعة 

يا مسكين نعطيك اشارة

رضى بالقسمة حسبها طاعة

عيش لعمر لا يضيع خسارة

الدنيا ساعات ودقايق

تربح فيها ناس الصبارة

وغدا يفوز قلب فايق

بنادم  مسير ماليه خيارة

                                                    نظم بلعيد بومرحوم زايده في 2001

 

 

هد الدنيا تبكي

             
      السيف الحافي 

 

                       
جربت  قلة المال
ولقيتها  سيف   حافي
ما تقطع ما تربط حا ل
ما تطفي لهد الزمان عوافي

بقيت غادي مع الايام  نتخبط
ونكول حالها غذا يحلى تخفاف كتافي
ولقيت اليوم الفلس عليه يدور الحرث والشرط
الكلام في زمانا  بلا فلس  ما كافي

عيت نقلب فالاصحاب
على شي صديق وافي
معايا ما يشد   حساب
من الاصحاب من يقلب على شغلو و صافي

كلها يسقي غير غلتوا تنبت وصافي
ونور الصحبه اليوم بهت وطافي
الصحبه الصا دقه فالحجر تنحت
الصحبه فن ووفى ما خافي

وعرفت ما بيدي  حيله
طلبت الله يشافي
ويجعل ايامنا وسع وحبال الا مل طويله
ويكفي بالقناعه حالنا ويعافي

 

قلة الشي حاره مرة

في اعز الموجة يتهرس مجذافي
الفقر عداب والصبر ليه ثمرة
نار الحاجه سخونه تكوي تعلم القوافي

 
نطم بلعيد بومرحوم       زايدة في 6 - 5 - 1999

قصيدة زجلية بعنوان -مغربي-

 

 

 الأمية

ياندامت اللي ماقرى

عايش ظلام فظلام

وحياتو كلها عذاب

ما يعرف ازمم  برا

ولا يفصل كلام

ولايزطط حساب

ما يفرق قصب الذرة

من عود القلم

 ولايعزل لوحة من كتاب

عايش بين الناس حكرة

ما يعرف فين يرمي لقدام

بلى قصد ميتقن صواب

فبرطابل ما يعرف يقيد نمرة

بلا سمية يحط لأرقام

عل لماضي يطلق عتاب

ما يشكل حروف الهضرة

العلم يعلي المقام

والقرايه تعمر القراب

تعلم من الاميه تبري

       القرايه للدنيا ايدام       

  بالعلم الحجر يرطاب

   هذا زمن فيه العلم كمرة

           تعلم وخى كبير لا تلام          

القراية تفتح كل باب

                                    نظم بلعيد بومرحوم في: 21 -11 -2020